Oggulítil barnapeysa

Þessi litla peysa er án hneppingar og er tilvalin að prjóna sem fyrstu peysu. Hún er prjónuð fram og til baka og er saumuð saman í hliðum og undir ermum. Kanturinn framan á peysunni (og kraginn) er svo prjónaður á eftir.

Og í minnstu stærðina (stærðirnar) fara innan við 100 grömm.

Peysan er prjónuð úr tveimur þráðum af SuperSoft Textílgarni og uppskriftin heitir Ribbed Baby Jacket, úr bókinni Special Knits  eftir Debbie Bliss. 

Endilega kíkið á Ravelry til að fá meiri upplýsingar um uppskriftina eða á bókasafnið og fá bókina lánaða.

Til minnis:

Uppskrift: Ribbed Baby Jacket, úr bókinni Special Knits  e. Debbie Bliss

SuperSoft Textílgarn 100 gr  litur blágrár. Prjónað úr garninu tvöföldu.

Hringprjónar (eða tveir prjónar) nr. 4,5

Camomille sjal úr Önnugarni

Það er orðið dálítið langt síðan ég prjónaði Camomille-sjalið, þó svo ég hafi ekki fyrr bloggað um það.
Sjalið er einföld þríhyrna og svo er prjónuð 'jaðarblúnda' í lokin sem gerir það ótrúlega flott.

Uppskriftin er eftir Helgu Isager og er að finna í bókinni amimono sem kom út árið 2010.
Í bókinni er sjalið prjónað úr tveimur tegundum af Isager-garni en ég notaði Önnugarn frá Textílgarni ýmist einfalt eða tvöfalt. Önnugarn er ullar- og bómullarblanda þannig að sjalið er afar mjúkt viðkomu.

Ég veit að bókin var til sölu í Ömmu mús, og svo er um að gera að athuga á bókasafninu.

En fyrir ykkur sem hafið ekki aðgang að bókinni og viljið prófa ykkur áfram, þá ætla ég að benda á spennandi vefslóð með uppskrift af 'jaðarblúndu' sem heitir Belmina Lace.

Hún er kannski ekki alveg eins og Isagerjaðarinn - en kostar ekkert og býður upp á eigin útfærslu.

Til minnis:

Uppskrift: Camomille úr bókinni amimono: knit collection 2010, e. Helgu Isager

Textílgarn Önnugarn ca.120 gr   litur: Sapphire

Hringprjónn nr. 4,5

Sumarpeysan í ár

Mig hefur lengi langað til að hekla peysu. 

Og þegar ég rakst á uppskrift í vor þá lét ég verða af því. 

Ég ákvað að hekla peysuna úr tvöföldu garni, annar þráðurinn var SuperSoft í ljósgráum lit (Silver Grey) og hinn afgangur af hvítum plötulopa.   Úr varð fallega ljósgrár litur, dálítið daufur fyrir minn smekk þannig að til að skerpa aðeins á litum þá heklaði ég alla kanta í milligráum lit.

Peysan er hekluð ofanfrá og niður.  Til skiptis er hekluð ein umferð stuðlar og ein umferð fastahekl. 

Ég hafði uppskriftina meira til hliðsjónar en að ég færi nákvæmlega eftir henni. Mátaði bara og tók úr og bætti í eftir því sem þurfti. 

Þar sem ég var að nýta stakar dokkur og afganga er ég ekki alveg með magnið, sem fór í peysuna, á hreinu en tilbúin vegur hún 570 grömm.  

570 grömm með tölum altsvo. Og tölurnar eru keyptar í Litlu prjónabúðinni. 

Til minnis

Uppskrift: Top down crochet cardigan

Textílgarn SuperSoft ca.200-250 gr   litur: Silver Grey

Álafoss plötulopi ca. 3-400 gr í hvítu

Heklunál nr. 5,5

Draumarendur...

..heitir þetta sjal eða Dream Stripes og er ókeypis á Ravelry. 

Tiltölulega einfalt og skemmtilegt prjón, þó vissulega þurfi að vera vakandi í gataprjóninu.

Ég var ákaflega ófrumleg í litavali og notaði litasamsetninguna sem sýnd er í uppskriftinni, grátt og beis (Mercury og Chalk).  Ég hef séð sjalið prjónað í blárri útfærslu og eins rauðri og það eru ekki síðri samsetningar með beisaða litnum. Hann gefur svona.. ja mjúkan blæ. 

Og garnið er Samarkand, uppáhaldið mitt þessa dagana, úr 75% ull og 25% silki.

Til minnis

Uppskrift: Dream Stripes  af Ravelry

Samarkand Textílgarn, 50 gr Mercury, ca 25 gr Chalk

Hringprjónar nr. 4,5

Húfuveður

 

Undanfarna daga hef ég prjónað húfur. Margar margar húfur. 

Mér finnst það með ólíkindum hver húfuþörfin er á þessu heimili.

Annars er húfuprjón svolítið skemmtilegt. Það er einfalt og fljótlegt og ekki svo garnfrekt ..og oftast næ ég að grynnka aðeins á afgangakassanum. Sem er auðvitað ótrúlega góð tilfinning.

 

Í þessar húfur, eða kollur, fara rétt um 40 gr af SuperSoft. Ég þarf ekki nema ca. 20 gr af lit því oftast set ég saman tvo líka liti sbr. bláu og fjólubláu húfurnar hér fyrir ofan. Hringprjónar nr. 4 eða 4,5 eftir því hversu þétt prjónið á að vera. Og uppskriftin er sáraeinföld (sjá neðar).

Til minnis:

Ca. 40 gr af SuperSoft Textílgarni
Hringprjónar nr. 4,5

Aðferð:  

Fitjið upp 95 lykkjur og prjónið stroff í hring (3 sl og 2 br).
Prjónið þar til húfan mælist 13-17 cm, hér verðið þið að ákveða lengdina því það er ótrúlega mismunandi er hvað fólki finnst vera passleg húfustærð. Húfurnar hér fyrir ofan eru allar frekar stuttar 13-15 cm að úrtöku. Úrtakan er svo ca. 7 cm.

Úrtaka: byrjið á að fækka sléttu lykkjunum, takið saman miðlykkju og slétta lykkju til vinstri.
Prjónið 4 umferðir - ath. að nú eru sl lykkjurnar tvær og br lykkjurnar tvær. Samtals 76 l.
Í næstu umferð er úrtaka, þá fækka ég br lykkjunum og prjóna saman br lykkju við fyrri sléttu lykkjuna (en auðvitað má líka prjóna 2 br lykkjurnar saman).
Prjónið 3 umferðir - ath. nú er sl lykkjurnar tvær og ein brugðin lykkja. Samtals 57 l.
Úrtaka: prjónið sl lykkjurnar saman
Prjónið 2 umferðir - ath. nú eru lykkjurnar 1 sl og 1 br. Samtals 38 l.
´Úrtaka: takið saman tvær og tvær lykkjur.
Prjónið 1 umferð - ath nú eru allar lykkju sléttar. Samtals 19 l.
Úrtaka: takið sama tvær og tvær lykkur og þá eru 9-10 lykkjur eftir á prjóninum, slítið frá og dragið í gegn.

Og þá er bara eftir að ganga frá endum og þvo húfuna.
Ég þvæ húfurnar úr ylvolgu vatni og með dálítilli sápu (ég set sápu tvisvar og skola á milli), kreisti úr henni vatnið, og legg á handklæði og svo er bara að fitja upp á nýrri meðan beðið er eftir að þessi þorni.